Den Tony Ross ass bei Kremart Edition gelant! De bekannte briteschen Auteur an Illustrateur, Joergang 1938, kann op eng „carrière prolifique“ zeréckkucken.

Pénktlech virun Ouschteren an en Vue vum internationale Kannerbuch-Dag den 2. Abrëll stellt Kremart Edition direkt zwou Iwwersetzunge vu Bicher vum Tony Ross vir: e ganz neit Wierk an e Klassiker, deen antëscht schonn drësseg Joer um Bockel huet, ma nach ëmmer kleng, aristokratesch a beléift ass …

„D’Buedwaassa-Monsta“ ass déi genial Geschicht vum Mathis a vum Tunn, déi näischt léiwer hunn, wéi sech dreckeg a knaschteg ze maachen. An da musse si an d’Bidden.

Ma hues du dech schonn eng Kéier gefrot, wou dat knaschtegt Waasser aus der Bidden hileeft? D’Buedwaassa-Monsta schluppt et natierlech! Dat ass säin Zweetliiblingsiessen a kee wëll wëssen, wat et am léifste frupst …

De Luc Marteling war direkt mega begeeschtert vun dëser Geschicht vum Colin Boyd an Tony Ross an huet se prompt op Lëtzebuergesch iwwersat. Aus „The Bath Monster“ ass „D’Buedwaassa-Monsta“ ginn.

Radio Lëtzebuerg – kuerz (um Wupp) – iwwert d’Monsta 🙂

D’Buedwaassa-Monsta
Kremart Edition
ISBN 978-99959-39-32-8
28 Säiten
12,95 Euro